ضمير مستتر
عيل من شبرا شبه نفسه
بيحب الناس من كتر ما شاف
ويحب الليل من كتر ما خاف
ويحب البرد ومطر الصبح
والشاي الزردة في "كيلوباترا"
ورغيف العيش الناشف حاف
عيل مش قادر يبقى اتنين
وما عش يومين على بعض غريب
بيفكر دايما في التانيين
ويحب عياره اللي ما بيصيب
ويحب القهوة اللي ما تبردش
وكلام الحب اللي ما يخلصش
وأغاني الست
وصوت فيروز
والشعبي اللي يسلطن مش هتش
واد من مواييل الصبا .. وبياتي
من كتر ما بيفكر بيهاتي
ويقول ويعيد في القصة يوماتي
ويكرر حلمه وما بيزهقش
عيل من جيل الصبر جميل
والثورة على الصابرين أجمل
عيل مفطوم على حزن النيل
والفرحة اللي ما ترضاش تكمل
نفسه المقطوع في المر طويل
عيل في النكتة ما بيهذرش
عيل بيحب كلام الله
في كلام الناس عن أحوالهم
عيل بيحب المشي كتير
وبينهج بس ما بيوقفش
متأخر على كل المواعيد
لكن في معادك بالثانية
ويحب السهرة الصباحي
ويموت في الدنيا عشان دنيا
ويحب نداوة الفجر أدان
من رفعت أو م المنشاوي
ويحب الصوت الصافي حنان
ويحبك أوي علشان غاوي
ويحب كلام الأبنودي
مع إنه ما بيحبوش هو
ويحب فؤاد حداد جدا
شاعر من بره ومن جوه
ويحب أمل دنقل ونجيب
ومريد وتميم وأسامة غريب
ويحب يكون للخلق حبيب
ويحب كلامه إذا حبوه
ومالوش في الخوف م الخلق نصيب
وبجاحته خجولة .. يشبه أبوه
عيل من شبرا شبه نفسه
وشبه كل اللي اتربوا معاه
ولأن مفيش حد اتربى
تلقاه تايه
ودليله وراه
لكنه مصدق ..
وبيحلم ..
وهيوصل
طول ما الحب معاه
"قصيدة لمحمد طلبة رضوان"
#ضمير_مستتر
#شبكة_صوت_الحرية #انتخبو_العرص
