بمناسبة موضوع الثانوية العامة
المشكله ان احنا خلاص بقينا مصدقين ان الدرجه بتفرق وان التعليم شئ اساسى
فى بلد مفيهاش تعليم
يعنى ايه حاصل على درجة نهائة فى كمبيوتر ومش عارف حتى تسطب نسخه للجهاز بتاعك
يعنى ايه حاصل على درجة نهائة فى فلسفه وانت فاشل فى الحوار مع الناس
يعنى ايه حاصل على درجة نهائة فى علم نفس وانت مش عارف ايه الى مضايقك ولا فاهم الناس
يعنى ايه حاصل على درجة نهائة فى عربى وانت اصلا فاشل املاء
يعنى ايه حاصل على درجة نهائة فى انجليزى ولما تيجى تشتغل لازم تكون واخد كورسات عشان الانجليزى بتاع المدرسه ده ميأكلش عيش
يعنى ايه حاصل على درجة نهائة فى ايطالى وانت عمرك ما هتروح ايطاليا اصلا ولا هتشتغل بالايطالى
يعنى ايه تقفل دين وانت مبتركعهاش وماشى مع 9 بنات والكدب والسب على لسانك 24 ساعه
يعنى ايه حاصل على درجة نهائة فى جبر وانت مش عارف انت هتستخدمه فى ايه اصلا هو والتفاضل وتكامل ومش عارف الداله دى بيتعمل بيها ايه فى الحياه العمليه ومش عارف تكون منظم اقتصاديا
يعنى ايه حاصل على درجة نهائة فى احياء وانت متعرفش ان التعبان بيبيض وان الدولفين من الثدييات ومتعرفش ان الطماطم فاكهه ولو سألتك عن طول الامعاء مش هتعرف (9متر)
يعنى ايه تبقى حاصل على درجة نهائة فى كيمياء وانت متعرفش اضرار اكل كتير فى حياتنا زى الشيبسى الماده الحافظه الى فيه هى نفس الماده الى بتستخدم فى حفظ الجثث فى المشرحه
يعنى ايه حاصل على درجة نهائة فى جغرافيا وانت هتستفيد ايه لما تعرف ان العراق فيها 33 مليون و انت بتوصل بيتكم بالعافيه
يعنى ايه حاصل على درجة نهائة فى فيزياء وتقف على كوبرى على النيل مش عارف انت لو نطيت هايحصل ايه بظبط وتبقى عايش على احتمالات لحد ما تشوف نطه فى فيلم وتنط وانت مش عارف انت المفروض تنزل ازاى بظبط فتتفاجئ ان مفيش عضمه فى جسمك سليمه
استفدت ايه من الى درسته لغايه دلوقتى فى مصر ؟؟
تفتكر الشغل الى هتشتغله لما تكبر هايكون له علاقه بأى حاجه درستها
اسأل اى واحد متوظف فى اى وظيفه جديده ايه اول كلمه سمعها هايقولك قالولى انسى بقى كل الى انت درسته والى تعرفه عن الشغل ده وبدأوا يعلموه
بلد الشهاده فيها مجرد ورقه فى برواز على الحيطه عشان بابا وماما يتباهوا بيها لما يجيلنا ضيوف

بقلم: #دكتور_كريم_فوزى